IB運作

用IB超過半年, 對運作有一定認識, 覺得幾好用, 成本低, 自己落盤平倉, 係銀行自己操作費用太貴, 現在都少用, 除非抽新股, 仲未試過轉回資金, 相信三月前會操作一次, 我會儲三個月先提款, 每個月可以免費提款一次, 要留資金做緩衝, 我期權, 正股同外匯都交易, 要資金比較大, 所以唔可以每個月提款.

215和記電訊

和記今日升咗5%，我以為有消息，又唔係，成交量好大，帳面我都賺了，但無理由唔等，我目標價4.5，到我又未必等，鎖定利潤!

行山樂

假期展開，行山是我近年參與運動，早前行過大潭水塘，我家工人姐姐都喜歡行山，佢只去城門水塘，連車費都慳番，從我家是有能力行過去，可以拓寬視野，又可以燒時間，燒脂肪，消費好低。

今次轉戰荃灣，行荃元古道，說古人就是這樣從荃灣到元朗，時間要7-8小時，我行半段到深井，全段無可能，另一條行川龍，在香港這麼少城市，過田園環境只可以行山，在山中游走。

假期前有朋友介紹咗一本投資書俾我，但我找不到，反而搵到講期權，講期權書唔多，所以我買咗，黃祥輝期權大贏家，我認識基本，變化不太懂，純自己邊做邊取經驗 ! 我未溫完本書，都未實施，不錯遲些再講讀後感想。

冬至交易日

我今日都未等到和記派特別息，不過前一日林本利博士說和記最抵買，他用2.84入貨，連他都這樣說，我都非常有信心等，這是價值投資一個案例，我反而入了河北建設，我始終都睇好雄安概念，投資時間比較長，祝大家冬至快樂!

隨心生活

不知不覺我退休超過三個月，今次比上次適應下來，係午後比較悶，雖然我會運動，但只一小時，早上好處係自然醒，不需一定要指定時辰起床，現在起身都過8點，吃早餐都接近開市，開市會留意狀況，期權有好價可以做，八成甚至可以平倉，一個月做期權收期權金比上班月薪還高，當然我是從股市有一定經驗同時間，對上市公司業務有認識同識財務報表，做上市小股東必須的常識，我之前工作是會計，係公司最低層，現在做投資做股東，睇報表就是我之前工作總結，其實超過20年會計生涯是提升自己的時候，做自己基金經理，在2008年開始我做自己基金經理，當時有工作，基金經理是副業，資金係自己按樓得來一桶金，當時覺得做不來還有一份正職，輸得起，轉型都要資金同時間，很lucky一路上都算順利，今日巳經一桶金變成很多桶金，有時候都睇錯，要止蝕，止蝕是復利敵人，最好少發生止蝕，看書超過數十本，上課都有，不斷提升自己戰鬥力，現在發覺當基金上到一個層次，增長可能不及初期，不知怎解，基金還是要走，今年加入期權同外匯，外匯我試過幾種貨幣，日元我比較喜歡，我只做沽日元，成本較低，高低位易掌握，期權都係short為主，long試幾次都不行，上課老師個個都做到long，次次賺到不少利潤，我又真係唔明白!

我識幾個股票朋友，如果有一日突然離場，那代表輸得很甘或上岸，做基金唔想一舖清袋，就是不能去到太盡，幾個朋友離場就是舖舖哂冷，我係慢，慢到不知不覺過十年，還可以在市場生存下來。

和記電訊近況

我最近做期權興趣慢了，因為和記電訊挑起我神經線，我一直在增持，現在都收手，再多就是壓力，呢排起動中，我睇番佢歷史高位超過4個半，現價都有不錯回報，但無可能唔等派息，所以一直在等，如果個價上到歷史高位仲等唔等，4個半係幾年前的位，我想高追都放哂，最低都試過2個半，跌近一半都唔會仲係手，唔賣唔知值幾錢，想真香港電訊牌不多，來來去去都係幾間，談不上獨市，但都半獨市，又講回真到歷史高位仲等唔等? 我諗我會放一半，就係咁我無心機做期權，還有我預期會有一次調整，冬至前發生機會大，12月加息巳經落實，地產我巳經唔敢做，現在剩一手恆基加送100股，但我有機會做回新世界期權，我一直都想買回!

12月期權

今個月忙, 唔記得出新期權表, 大部份平倉

stock option  price   qty   receive  return 386 SC      6.00    10,000.00       1,077.00 21.54 1898 SP      3.60    50,000.00       4,457.00 29.7133 700 SC   400.00         200.00       1,612.00 24.18       7,146.00     17,884.90 (巳平倉)     25,030.90

今日大跌市

今日大跌市，好彩隻215企穩，405我都見慣佢潮起潮落，因為要收息生活，所以唔會短抄，我有股友話好驚，自從2015大時代經歷一次股災，今日感覺很平常心，我覺得唔跌個個都唔番工抄股票，最緊要自己條數計得掂，交易唔好搶火，今次要捱到農歷年，明年重新開始，2017年公司業績不錯，有利下降恆指市盈率，美國減稅成為全球稅率優惠國家，市場擔心企業回流美國，亦都是特朗普想見到，但稅收減財赤增加，同惡性競爭無分別，希望佢能捱過陣痛!

健康財富

我沒有工作後除了投資我平常最多時間做運動，多年工作積下來累令到筋骨好硬，於是增加運動量，散步一小時，練功一小時，晚上拉筋一小時，一直好想做到一字馬，大字馬，最近實行緊，唔拉唔覺緊，我睇網上教學，拉了一段日子，我覺得整個人都柔軟多，但完成我所講兩個動作還有一段距離，每次都感覺好痛，但都堅持下來，我人生現在比較深刻體會堅持兩個字，在投資同拉筋上學到，在過程中你會有無數次令你想放棄，氣餒，過後想想為什麼每次有困難就想放棄，現在你幾歲? 到死那一天你有什麼成功過?

在投資上我希望透過我對經濟前景分析找到一隻倍升倍，唔係一倍那種，亦不需要像騰訊，有十倍左右都收貨，在拉筋上當然做到一字馬同大字馬，再修下身咁，我現在瘦了點，有點成績，再柔軟更加好。

我願望從來不定太高，太高盞自己失望，何必為難自己!

215和記電訊

很快到12月，和記電訊曾經說12月大會討論派息，之前145億收購 ，即每股現金達3元，現價2.8，我本人覺得市場好奇怪，和記現在市值135億，我覺得非常抵，可能股民無耐性，加上早前騰訊咁熱，又招股，資金流走出去，散戶比較著重眼前個形勢，唔識咩價值投資，可能亦覺得唔會派特別息，我一於少理，不停買入，等運氣到，機會留俾有準備的人，我睇過披露易，長和持有和電67%，街貨33%，如果長和要現金，派特別息成數好高，派幾多呢？我計過扣50億負債 ，派盡應該有2元，範圍約1·5或1·8左右，唔知是否可以在聖誕節前收到這份禮物呢!?

期權延期知識

我隻中石化SP應該要接貨, 但IB有延期, 我打算接貨, 但一直未試過做延期, 跟著教學視像學, 講英文, 我邊看邊了解, 自從我用IB英文好咗, 結果我了解哂, 做了, 但發覺唔抵同無買家, 結果取消, 我接咗都袋咗期權金, 係下個月可以SC, 了解後識多樣, 其實可以平倉在下個月做同一個倉, 唔使蝕期權金, 但要俾手續費, 最後我選擇接貨.

11月份投資業績

自九月後我一直在做投資工作, 期權巳經做到一月份, 二月份未做, 十一月期權回報接近30000元, 十二月份差不多, 因十一月還有兩個options未平, 應該到期自然平倉, 12月會加埋兩個SC options, 個倉從七月計到現在, 連股息都近30多萬收益, 未計12月份, 年過100萬未達標, 仍需努力.

10年一股災限期還有一個月, 過了12月沒股災, 加上明年業績應該有不錯增長, 特別是國內, 恆指市盈率會因業績增長而降下, 40000似乎在望, 現在有來年業績支撐住, 資金無流失, 加上國內人開始投資港股正增加, 希望可以向好.

離目標又接近了, 可以實現理想比較容易!

30000點你在何方?

過了30000點賺到錢人不多，我個倉都叫升到5成，另外個強積金都有不錯增幅，因為我未夠法定退休提不出，自己先行退我要自僱去供，暫時考慮中，到退休能取還有很遠，怕到都蝕哂管理費，騰訊期權倉平哂，急升下回調再睇，開始做內銀期權，內銀好睇人仔，人仔升內銀向好!

越房有新項目

上次講完越房又有新項目，越秀地產賣一幢武漢商廈俾房託日後收租 ，暫時未知是否通過?
印象中佢有買賣都會通過，作為股東我想增加收股息，年年有派息增長到我真正退休年齡可以過到一個不錯晚年，我期權還有十日左右就到期，中煤應該SC收盡期權金，無想過中石化要接貨，我本身都有貨係12月做SC,佢收息都有過5厘，想不到佢股價咁弱，到業績期會升，所以明年我巳較低價再SP可以拉低股價，其他都巳經平倉。

友邦發威

我隻愛股友邦發威, 終於企上65樓上, 持有數年, 希望佢一路壯大, 我另外405企在4.95左右都算企定定, 呢隻股唔明白跟內房股走, 佢係一隻 reits, 佢最正有兩個地標物業, 一個係白馬廣場,另一個廣洲IFC, 每兩年加租, 增長有保證, 比買樓收租更好, 現在買樓收租都唔知有無兩厘, 但我現在收7厘, 還要零打理, 為什麼那麼多人貴價追樓呢?

人生財富孖寶

財富孖寶一定健康第一，財富第二，呢排天氣令我感冒，昨天趕快睇醫生，退休後每天一小時練拳一定保持，開始兼職教練， 所以呢排無網文，努力適應教練工作，如果病咗什麼都做不成，閱文我抽到一手，我暫時未放，一手做鹽都唔咸，賣了錢又不等用，會不會像佢阿媽拆上拆，那樣就多些股數，我決定擺低。

我退休兩個月，強積金又拎唔到，因為要過60，60好像要證明才能取，65歲才是真正退休日 ，我都好煩，剛兩年合約工作跟我之前工作強積金是兩間不同公司 ，我現在將兩年合約搬到之前長工戶口，最近兼職在另一間保險公司重新來過，兼職有幾錢，又要供，好彩只僱主供唔關我事，我又唔想長工戶口擺到65歲先取，零供到最後渣都無，我決定自僱每個月供，大家有無認為好煩，我離攞錢超過10年，無可能睇住貶值，強積金制度一般，如果我攞到用來投資，肯定回報好過現在，好老實我都唔知基金表現點解好核突囉！

有朋友問幾多錢先退休，最基本要有自住屋，特別在香港退休更必須，現金要有一定質素起碼都要1000萬，呢1000萬係做種子，唔會使老本，使老本種出來果實，靠果實過生活，無人知自己在世上多長時間，老本唔夠到時無能力工作唔通靠政府，所以我覺得一定要1000萬，預埋未來幾十年通漲。

7月-10月戰績

我從7月巳經決定了退休, 開始好積極在投資上, 到10月我計埋股息都賺了幾十萬, 感覺自己終於做到了, 希望港股像美股一樣慢牛, 慢牛對我現在投資很有利, 我都取了一些資金放在雞蛋上, 畢竟我希望搵到隻會變大雞股票, 搵隻有前途股票, 一定要可以改善人類生活, 新經濟多數唔會用太多人力, 會發展網上平台, 所以我一宜對電訊股都有期望, 無好通訊如何發展平台貿易, 在香港有財力走更遠非香港電訊不可, 國內一定中移動, 國內巳經開始5G. 

抽新股

早前有朋友問我是否抽新股? 說幸運大抽獎, 抽到都賺錢, 我興趣不大, 最近我有抽閱文, 我銀行提供抽新股優惠, 172元可以抽一萬股, 一手都覺得無咩機會, 如果要鎖死資金咁耐又不太想, 俾少少按金可以抽一萬股, 唔怕博一博, 知道個認購超哂額, 一萬股有一手都危危地, 分分鐘172成本都無埋? 我計過發行股咁少, 是抽得過, 今次同買六合彩無分別?

我開始做明年一月份期權, 我隻靚蘋果升到上天, 偏偏我做期權, 我在考慮賠錢拆倉再開175倉是否比較好? 但如果上唔到175我會損失補出來期權金, 真進退兩難, 今晚先再算!

做期權賺幾多整定? 呢200股我都做了幾次期權, 都賺了幾次, 但想不到今次爆好多, 香港只有騰信才有爆升, 呢兩日我都開了騰信倉, 11月同12月, 我會加入呢隻做每月必做期權.

11月期權倉內容

stock	option	price	qty	receive	cost	return
12	SC	55.00	2,000.00	940.00	110,000.00	10.25
1898	SC	3.80	50,000.00	3,457.00	190,000.00	21.83
AAPL	SC	1,248.00	200.00	4,159.54	249,600.00	20.00
386	SP	6.00	10,000.00	1,800.00	60,000.00	36.00
AAPL	SP	1,170.00	200.00	2,380.54	234,000.00	12.21
BABA	SP	1,306.50	200.00	6,042.50	261,300.00	27.75
				18,779.58
				10,264.61(巳平倉)
				29,044.19

11月期權倉

今日早上有時間整理個倉, 405增持到七位數字, 未來都不會再增加, 再入會考慮其他, 808我還可以買, 略嫌沒有地標物業, 不似405有廣洲ifc 同白馬廣場. 或者考慮778置富, 其他215, 3322.2009等下一次業績, 平時只有做期權, 11月倉港股加美股都收幾萬期權金, 希望每個月能達幾萬, 加埋股息, 年收7位數字不是無可能, 我預期兩年時間達標, 要做到這成績平時要好勤力睇好價位收期權金, 今日設計一個表管理期權金同股息, 要最少成本來收高益期權金, 我朋友做好多隻股票期權, 我希望集中5-8隻, 容易管理, 做長線投資不難, 睇中目標合理價擺係度長揸, 每年跟進業績同年報, 留意有無變壞, 變壞就要放棄, 相反做期權要好積極, 每個月都要搵好位入, 回報都係百分之十五左右, 如果有1000萬本金, 回報有百分之十五, 真不錯回報!

追劇反黑

最近網劇反黑很紅，我都去了追戲，黑社會江湖片，但我都有兼顧投資，上星期SP KNOP成癈紙，期權金收盡，今星期五到蘋果，估計到160有困難，應該唔使俾貨，真的下星期一再SC過，下個月SP 蘋果148 同150，一個月兩個結算日，我儲美元期權金不知不覺達五位數，我還未轉港元，打算再儲下多些，港股似乎有回調，11月接貨機會大，我美股未試過接貨同出貨，所以我對港股期權興趣大減，港股要好貼價先吸引，相反美股差價大，但期權金都有吸引力，不然都不會有五位數收入。

十九大開會了

19大今早開業, 股市失方向, 我依舊繼續做外匯, 做期權, 我隻蘋果巳經到SC價月尾被接貨機會相當高, 我在11月分別做兩次蘋果SP期權, 同一個月兩個結算日, 所以我喜歡做美國期權, 今星期五我KNOP 到期, 應該唔使接貨, 來緊開了明年一月, 同四月, 咁耐以來做期權儲超過5000美金, 計埋7月以來所做期權都有6位數字, 做期權係比較慢, 但十多個百分比回報是不難, 我現在港股都向12月同明年一月進發, 十一月有8成平倉.

自我退出職場後, 我有整理家中事物, 最近好狠心將一直擺但不會穿衣服掃走, 夏季衣服不阻地方可以留低, 點解成日買錯, 有些我不停穿, 我將不要送去救世軍, 同自己講小心購物, 我用好幾年背同腳底按摩有些問題, 畢竟都4年貨仔, 我到osim睇下新型號, 佢地第二代在今年出, 新腳底按摩好輕巧, 相比我舊款40磅, 現在只7磅, 睡在床上都可以按摩, 力量比前更貼, 背部同樣更貼身, 感覺不錯, 價錢比4年前更平, 我信用咭免兩期供款, 本來不打算分期, 但有優惠就不得不做, 我很長時間沒有在外腳底按摩, 因為機器追到人手, 現在連背部都好貼位, 原來按摩師都會被取代, 最重要在家幾時按都得. 我以為會計被系統取代, 想不到手工按摩師都面臨危機. 

高位買賣

我星期五再入金隅股份, 希望19大有雄安發展消息,手上和記電訊慢慢步上, 12月業積期會有交待, 我最近入一隻細價股, 就是恆騰網絡, 呢隻前身係老千股, 自恆大騰信入股後, 新業務有點起色, 最重要年底業績, 決定業務是否有發展? ,我睇過佢業務係在恆大地產樓盤加入網絡, 照顧住戶生活所需, 我現在是自住屋苑副主席, 都有想過屋苑組網絡, 可以交換二手物件, 因為我見住戶都好多野唔要但仲用得, 或者有其他業主要, 或者其他宣傳, 不用高成本但互動大, 所以恆騰新業務我幾睇好, 我買入預total loss, 明日之星都是從細價股開始, 我買股多年, 平穩百分之十幾回報, 是無難度, 但10倍股未試過, 所以我希望能夠找到, 當然不是靠莊家股, 係睇業務前景啦!

投資進度

話說入了恆基, 我真在施政報告前放了, 我接著估不到會跌突, 我算是好彩, 同時在美國做一個明年4月期權收1300美金, 我現在比較喜歡美股期權, 不貼價利潤比港股期權好, 可能多人買賣, 不知不覺累積一些美金, 不知道美金可以提取, 還是換成港元, 我同時有做其他外匯, 儲了日元, 個戶口好多種貨幣, 一個戶口股票, 股票期權, 加外匯睇到眼花, 手上有好多投資, 其實金融經濟都是我讀書時候喜歡科目, 我中學讀商科, 後來會計比較好成績, 集中會計, 我對經濟都有興趣, 想不到退休先接觸.

平日對市都無時間睇書, 留在星期六, 日先睇, 進度又會拖慢了.

恆基地產

昨天入了恆基地產，今日升咗不少，個心十五十六放唔放好，因為明天可能會回，今日在高位回軟，有些之前55.95入之後縮表跌都嚇死，到家鄉即放，有些即食，幾個價位就放，臨蟹貨區遇到沽壓，今日創唔到新高，所以明天可能放一半，睇大市如何！我唔想太多貨在手，因為我腦海永遠有股神金句，第一唔好蝕錢，第二不要忘記第一條！

買貨容易沽貨難！

現金流計劃

自從轉去IB後, 投資心態有改變, 我老師喜歡投資有倍升股票, 但時間你係唔會知, 十年走不掉, 期間要起起落落, 投資終極目標係錢, 唔好咁複雜, 倍升股要慧眼識英雄, 係最平價時買入, 不然談不上倍升,更不會大筆錢等10年, 呢類股唔會有股息, 人生有幾個10年, 信未來通漲持續, 資產有升無跌, 那選有資產收租同持續有固定現金流產業無得輸, 公司可以陪你一齊活下去, 咁每晚都可以笑到睡天光, 有閒錢咪先慢慢搵成龍股一注過, 無咗都唔痛!

見一年買一層樓, 收租的錢要供樓, 過程都要20年, 現在樓價要供30年, 20年我計埋通漲, 真正入袋要20年後, 中途要天氣似預期, 樓好像無敵, 水能坐舟亦能覆舟, 出現問題樓要賣出接手係好好困難, 當然講呢d俾人話傻!

投資高息股即時落袋, 使唔哂再買些一路儲, 錢多買多些, 錢少咪停下來, 隨心所欲!

大時代再臨

今日我執筆時大時代28588破了, 很快回落, 下星期國內開市會如何? 大時代的蟹貨令到恆指一衝而下, 我今星期有錢賺期權巳平倉, 美股我開始做期權, 美股期權參與人數多, 比港股期權好玩, 我開始外匯, 主力日元, 我巳經賺了兩次錢, 我需要借日元, 買港元令我借貸成本減低些, 不過有錢賺我平倉了, 參與外匯市場又係非常活潑, 上上落落秒秒變化很大, 全世界都參與, 搵錢每日都機會無數, 我沒有跟大時代, 買一些不起眼股票, 置身大時代太緊張, 反而一些不起眼股票更安穩, 我目標是非常安全複利式增加, 不求快慢慢增加巳滿足, 我最近增持越秀房託, 我增持巳到我目標量, 以後任務減槓桿, 我將賺了日元換港元去降低貸款額, 十元八塊唔覺唔覺又盆滿鉢滿! 眾安在線都係做一元一元生意, 巳經被視為大肥肉.

和記進展

今日和記售產交易完成，錢都收了，呢排電訊低潮，不然和記無可能跌穿三元，來緊手機業務零成本，這樣市場錯價就是機會，價值投資發揮作用，我買下來等運氣，我見這項交易係九成九通過，我相信賣產是一個好價錢，大家希望分到成果，我最近都增持現金，希望再入高現金流的reit ，因為加息大局巳定，reit被精明投資者拋棄，人棄我取，越平越好，我最鐘意執平野！

係時候又入永嘉

追我個blog都知我曾經入過永嘉，賺過錢，隨後打回原形有突，永嘉最近又賣地，過一億，我今日入貨，除了這個消息，另外一間廠批改用途，永嘉打算未來兩年只留一間廠在內地，在平成本國家生產，廠地改用途，折讓大，我在想佢國內地唔會年年估值，因為唔係REIT, 即使製衣前景差，我覺得資產非常值錢，決定重新入市，又在我之前價位再入，等機會。

買和記電訊

今日上午買入和記電訊，買入原因是交易以大比數99.9通過，賣產賣得過，呢隻股出通告收購曾經抄上，我賺了少少就放，因為短抄人太多，現在件事放淡了，加上電訊惡性競爭，成被沽空股票，賣產交易會在10月份完成，我見個價唔錯就開始入貨，完成個交易等收錢，市值同售價係一樣，剩下零成本，我都唔認為有其他電訊可以收購，分錢最實際，母公司可以分好大筆，機會很大，這次買股票我希望有15%回報，睇落應該大機會達標，一於出擊，我預不足一年達標。

售豐樹大中華基金

自耶倫公布九月維持利率不變，但下月減買債頭三個月每月100億，之後再加大金額，效果會在市場收緊流動資金，其實等同加息，我估計初步唔會有大變化，一兩年效果會浮現，美元亦出現變化，我同時見到坡紙回落，隨著美元加強，坡紙應該轉弱，去年10月分期付款買豐樹大中華基金，達到高位，這個高位是坡紙升而做成，我還有一個月供完，但我決定沽售，11個月回報達15%，其實更多，因為我分期付款，我都以整個投資項目來計算，在富爸爸窮爸爸指出每一項投資回報有16%應該收割，我同時認為豐樹大中華負債不算低，坡紙隨美元回升有很大機會回落，如果將來基金價格回到一元樓下，先再考慮。

收回資金等待下一個值得投資機會，我同時擁有REIT 是泓富同越房，泓富負債比較低，越房背景強，同系有創興銀行，借貸比其他reit強，我對人仔同國內經濟比較樂觀，初步保持，我本來想投資公路股，巳經入了貨，但有投資朋友叫我小心公路有交還政府機會，剛我投資合和公路其中一個高收益廣深公路10年後要歸還政府，我決定放棄，因為我好buy巴菲特金句，第一不能輸錢，第二不要忘記第一條，我每一項投資都緊記這金句，非常好彩我不用蝕放，還有少少利潤，我承認我未了解這股票就投資，因為我見佢派息好穩定，但我決定再花時間去分析公路股財務報告，或者情況不太差，公路股報告未睇過當增值！

美國九月會議

今晚美股開市應該幾波動，因為很快講縮表，但今日美元走弱，是否認為縮表不會出現，今晚看來都不會加息，而開始展望12月議息可能性，美國對全球匯股都很大影響，今日因爲縮表關係，reits表現不濟，領展跌幅相當大，據我之前睇財務報表，領展負債率好低，加息縮表影響好微，我見今日香港電訊又被質低，香港寬頻惡性競爭，香港電訊員工出示員工證過台可以有更好優惠，對香港寬頻這樣對競爭對手員工出招，真不知說什麼？做生意咁樣是否有問題，我留意香港寬頻負債率非常高，派息竟然派超過盈利很多倍，是否借錢來派息，這樣對股東有好處？電訊業是否只著重上台人數同消費作為投資指標？
我自問保守投資者，亦都是修會計同從事會計多年，這財務報表都敬而遠之！

挑機28500大時代高位

在28000衝破後下一個是大時代高位，我估計破到機會很多，下一個自然2007年直通車位，我開始打算將一小部分SC友邦出去，慢慢減持出貨50%，留50%睇佢去成點，畢竟現在不是低位，美國是否縮表？ 就算夾硬縮都要起碼5，6年時間，中途唔掂會再停下來，我開始買入防守股，股災來防守股會比較守得住，加上收息正，資金鬆動我會保持進貨，在這兩年我收股息巳經升了一倍，希望來緊都可以保持這增幅！

外匯交易

在我投資股票之前我一向做外匯，賺息賺價，自從美元量化，令到澳元紐元蝕息蝕價，我巳經無玩，近排用IB轉一批美元，除了投資美股，還可以做外匯，我先在美元低價入一批美元，數天前買入蘋果，同期做即月期權，收300美元期權金，剩餘我購入紐元，昨晚紐元漲價即沽出，賺了少少錢，我因為第一次用IB執行，所以只做細額交易，經過一次實習，巳經可操控，記得我在經濟商學院上課，全世界最大市場不是股市，而係外匯市場，昨晚望住價不停跳動，比股票快好多倍，果然不是假，我知道匯價玩法可以三隻貨幣一齊做，當然我未到這境界，玩住兩隻，IB係6個點子，比較銀行幾十點更好，收2元手續費，成本便宜，看來銀行競爭對手相當勁，唯一就是要自己親手操平台交易，我沒有交易員牌，感覺像交易員操作！

人民幣對港股

人民幣受到國內政府調控，回調連帶影響港股，如果人民再跌，相信港股表現會差，暫時忍耐下，過了十九大會好些，我晚上都會留意美股，我買入少量蘋果，自公布新機後下跌，我覺得蘋果新機銷售不會差，我有貨SC，我又估不到九月有超過幾個結算日，證明蘋果股票多人交易，所以期權結算日一個月內有數次，我做開KNOP每個月一個結算日，應該係股票交易量大，美股我11點做完都休息，唔會跟，不然賺咗補唔番，股票期權有些人覺得好難做，我習慣了做期權不覺一回事，我想用半年時間是否可以抵上一份工資。

越秀房託除淨日

明天是越房除淨日，我會收到一筆可觀股息，半年一次，我同時希望找到7厘息的股，我買入合和公路，現在都高息，今日我見Mapletree 又水漲船高，個息得6厘唔再加碼，期權再入咗些，搵到自己滿意就開倉，今日開12月倉。

今日有個朋友打電話來交換下做股票期權心得，佢專做股票期權唔會長期持有股票，佢話我收到一筆股息，又可以再多些錢做期權，又收多些，覺得持有股票都不錯，我說現在高位，要入都係有不利消息才平價，有捱價問題，我自問持貨力都強，唔擔心朋友要衡量好才出擊。

窮爸爸富爸爸讀後感

我用數天重讀窮爸爸富爸爸，我十年前跟書所講，買入股票同物業，進行投資，當中當然有困難，想像10年由零到今天可以自由退休，說沒有遇到樽頸都係騙人，不過財務自由決心大於恐懼，衰咗再試過，試多幾次有經驗，投資不會一條公式用到老，隨著環境變招，其中做生意我都想但總找不到項目進行，因為投資額很大，都是投資股票同Reits比較易控制金額, 如果穩定我日常生活，有機會接觸到營商，我都想一試，有心不怕遲！

下一本要讀就是思考致富，閱讀是我退休後首要想做的事，今日個市似乎向上，北水突然流入，所以話人要隨環境轉。

九月開倉

兩日開了好幾個倉如下：

Nov 2017

857 SP5.0 收0.16  5H
992 SP4.0 收0.12. 10H
1299 SP57.5. 收1.8 5H
388 SP205 收5.57 5H
1171 SP7.0 收0.21 5H

Jan 2018

Knop SP22.5 收1.0美金 10H


Stock
6823 30,000 9.75. Dividend 超過6厘，呢排低位原因同行追擊減價戰，我覺得影響有限，這類減價戰幾年會發生一次，我用過哂香港所有電訊商，最後都係6823，續了好幾次，價錢係貴，但服務我好滿意，情願其他慳都唔會慳佢，畢竟生活很重要，我落盤慢幾格都唔止呢個數，穩定對我來說好重要。6厘息可以津貼我手機費同服務費！

下星期一展望

386除淨會SC
386 SP

開兩頭。

開期權倉

昨天是我新生活開始，睡到自然醒，接近9點，以前要7點起床就趕，趕，趕！我昨天做中石油油期權同聯想，聯想破52周新低，我開11月認沽期權，晚上做了美股期權，開明年一月倉，一天收過萬期權金，我現在不敢做太多，只做跟油價的中石油，中石化我打算等下星期除淨，做SC，再睇位開SP,我主力做11月倉，可以收多些期權金。

我初步估計恆指會調整到25000點，昨天北水很多，但不是買恆指成份股，抄內房，連帶我越房都水漲船高，還有三日除淨，我唔打算賣，紙上富貴就係咁解，收市後我到又一城食乳酪雪榚，出奇地很多人流，原來閒人都不少，接著去按摩，晚上開始閱讀窮爸爸，富爸爸，這本十年前改變我人生的書，係我老師當年在imoney推介，我找不到去圖書館借，草草看一遍，依書中去投資資產，後來在書店找到買來留念，畢竟是一本好書，我現在重看十年前的書，感覺依然像初遇，欣喜不巳。

十年前看是對退休未來前路茫茫，十年後巳退休再回顧，別有一番滋味在心頭。

退休前後

今日係我工作last day, 在這日前因為股市業績出哂，市盈率過15倍，決定平哂期權倉除了美股一隻，專心臨走前埋數，由於預期無了工資，我開始在股票吸納405越秀房託收股息過活，每日日買一些，突然有一日爆升咗，我都無再入貨，離心目中數爭少少，升到咁高唔想入，心想食幾多整定，今日大跌都影響唔到佢，帳面利潤非常可觀，我手上有一批舊405，呢隻比較友邦令我組合出色，但好多人覺得國內物業唔好，情願買領展得幾厘，我同時開始準備做股票期權，呢排似乎往下調整機會高，我會貼身留意市況，同讀完證券分析，加埋練功，好好充實我今後生活，今晚晚餐後竟有一點失落，好好調節我心境，不要進進退退........

恆指執位

星期五因為騰信同匯豐超過10%, 所以要減比例, 提升友邦比例, 在60元站了數天, 下星期一開市就不清楚, 由於要離開職場, 我將資金轉到保守reits, 跟學另一個blogger配置, 我無用債劵做槓桿, 將手上長期持有股票做, 加大reits, 債劵期長我又唔熟悉, 我相信10年後磚頭都是增值, 我選405越秀房託, 因為睇好國內經濟比香港好, 香港租金都很高, 相反國內有空間加租值, 不過IB用股票槓桿低過債劵, 債劵唔出事最後保證還足本錢, 股票始終有上落, 我自問守到壞情況, 所以單頭出擊, 這樣我可以收到近10厘, 再加上每月做股票期權, 應該唔使東山復出, 附加自由時間讓我練拳, 練拳同投資是我10年前投放發展, 今日終於可以同時做我喜歡的事, 希望我無打錯如意算盤啦!

最新情況

一段時間無寫下網文, 原因我半個月都投入練拳, 提高水平, 從國內請了師父替我執毛病, 連投資都跟少咗, 基於現時恆指都不是在低位, 跟據最近業績特別國內, 情況轉穩定, 現時可以說中位, 再高是有條件, 大戶做唔做另一件事, 我將期權戰略不等到月底, 做大量期權, 有利潤就平倉, 做下雞糊, 我永遠記得巴菲特忠告, 第一不要輸錢, 第二不要忘記第一條, 輸一次要追就吃力, 達不到倍利效果, 由於交易太多, 今日打風我有時間整理帳務, 由於每天大部份練拳, 數好亂, 剛發現IB 的數據好強, 替我完成財務報告, 但我又突然好傷感, 作為一名會計員, 我被電腦取代了, 即是交易系統係我自己操作, 所有開倉平倉都是我一手一腳做, 電腦分析完就出報告, 會計員還有什麼好做?? 所以我職業一直被降價, 在這不得不提美國先進技術, 玩了咁耐, 由銀行買賣, 到證劵輝立再到IB, 收費一路低, 就是收費低才可以大開期權同平倉, 收費平, 一份33頁詳盡報告彈指間完成, 平時操盤都即時計好賺蝕, 我每個月按個掣就一清二楚, 節省時間!

自我7月決定工作合約到期不再續約我巳經開始期權收租, 到目前有超過7%回報, 達到我要求, 加上我長期投資收息股, 足夠我生活, 現在帳都不用整理, 我朋友還在用試算表整理呢!

7月結算日

28號兌洲煤被行使，其他都自動平倉，7月應該有9000元進帳，第一個月係唔多，8月多些，星期五跌市但我沒有開10月新倉，因為7月仍未平，我不太想再增加，先來個8月實況。

1）太古A SC80  收0.68
2）1113 SP60 收1.18
3）17新世界 SP9.75 收0.21
4）KNOT SPUSD22.5. 收USD0.65
5） 388 港交所 SP195 收4.90
6） 1211 SP46 收0.96
7）17新世界 SC10.5 收0.21
8）1299 LC 62.50 付0.57

今次用少少錢做LC，應該難純試，我有時候去講座講者真天下無敵，一做Long升都唔信，講者入好多手，現實版我的同盟話次次都輸，所以這些講座有保留，可能係俾號碼，咁樣就無意思啦。

我入咗和記電訊都是8月除淨，假如除淨日前完成賣固網協議，應該出貨，老師都說短抄，幾時出貨又未有指引，畢竟未發生處於可能發生，買係因為賣固網價值接近現在市值，手上還有更重要流動網絡，即重估價值，我個人第一次這種情況買股，這是買股票其中一個方法。

215和記電訊

早兩日停牌對市場回應賣固網事宜, 今日我買入等運氣, 成不成事都有息收, 買入不多唔想有壓力, 等幾耐無人會知道.

今日結算跟我預期差不多, 下個月未有時間列出來!

複製天下第一倉

天下第一倉主持人東尼巳離世, 很多年前我都有買壹周, 除了娛樂新聞, 最想追天下第一倉, 主持人用100萬開倉, 10年升到600-700萬, 我不是一直追, 只中途留意, 我當時心中有問號, 這種事會發生嗎? 好像不太可能, 很希望能擁有一個天下第一倉, 可想而知我有時間會發下夢, 到我產生準備退休金的念頭, 可能天下第一倉一直在心中, 終於我決定透過樓按. 產生第一筆100萬資金, 我還在雅虎博客做下紀綠, 可惜後來雅虎博客停下, 我記錄只留在我的個人電腦中, 我開倉是2008年, 我透過股票同投資物業, 同時遇到百年難得一遇量化, 這10年不停看書, 實戰, 唔識學到識, 迎難而上, 今年我都複製到天下第一倉2.0版, 將不可能變成可能, 我目標是10倍, 還有點距離, 但我不氣餒, 在這里我想說, 天下不可能難事都是用決心同堅持來達到, 很多年輕人用離地來逃避, 最後一事無成.

7月股票期權實戰

7 月倉

1) #17新世界 SC 10.50 10,000  收0.25  共收2,500

2) #17新世界 SP 10.50 10,000 收3000 0.31, 7000 0.30 共收3,130

3) #12恆基 SP 45 2,000 收0.56 收0.56 共收1,120

4) #19太古 SP 77.50  1000 收1.10 共收1,100

5) #1171兌洲煤 SC 6.75 10,000 收0.15 共收1.500 

倉成本445,000 期權金總計9.350

1) 我巳平倉, 成本用10元入貨, 最後我用0.04平倉, 實收2,100,
     巳在8月再開倉

2) 目前接貨機會高, 所以我將10,000 安排下個月出貨, 免太多         貨.
3,4) 目前接貨成數不高, 打算持到尾

5) 忘記今個月除淨, 以為會除淨日前會call 貨, 原因股價升超6.75 ,結果沒 call走, 我還有機會收股息1,377. 我認為會call走, 今個月爆升, 這是做short的不好處, 但我選這方式, 一定要接受, 有現金接 17
檢討 12恆基不太好, 我本身都有2000實貨, 但一直沒有好價錢做SC所以升到成本價會在市場沽出, 我長期倉巳有12, 所以不會可惜沽出.

七月份實收10,327

另7月購入實貨386 除淨收息約1800

利潤率27.84%

我朋友說一個月有20%都不錯

快到七月期權結算日

下星期是七月最後一星期，28號係期權結算日，我現在巳經完成九月份期權，一向持有股票依舊存在，我相信接近27000點有些人會沽出，以防像2015年般，今次升市非常不同，集中強勢股，外圍評論不多，酒樓都不見得好多人，我老師都叫我地繼續守，不要為粒糖放棄，本身我都有少比例資金儲備，現在用來做期權，持有股票做倉值，我股票期權是朋友教，我朋友本身不是長期投資者，用一筆現金做本錢，如果100萬可以槓桿約500萬，股票期權金可以約15%至20%，即可以有20萬，我估計朋友做得大，不然都不會全職，所以佢經常了解恆指路向，升市接貨機會不大，做10張訂單只接一張，接了會下個月SC出去，重點一定不持有股票，同長期投資背道而行，我比較貪心，兩面都想同時一起，加上工作，感覺都吃力，所以完成了工作合約都唔再繼續，長期投資股息都夠生活，換下自由時間，貼市早上九點半到12點，中午一點到四點，我估計唔使咁多時間，我朋友策略會先做大量遠期期權，日子接近會搵巳經減期權值先行平倉，用少少錢可以增加保證金，再開新倉，直覺都相當忙！

如果大家玩股票期權歡迎交流講下心得，我相信三人行必有我師！

投資兩極化

我一向投資會分開兩面，一面投資係唔會買賣，兩年前入現在都在，存放一個戶口，我密碼卡不會隨身，收到股息再投資。。
另一面是短抄，同做期權，股票期權我是跟朋友學，其實我同時學識指數期權同股票期權，指數如果做short風險大，做long很難做，會輸時間值，股票可以接貨，可能有人話直接市場買咪得，好多時我地買完都再跌，結果都是一樣，只係點想法，其實接貨機會無一半，在一個月期間如果股票上升，期權金會下跌，跌到幾個仙可以平倉，免翻生，我現在出現大跌會short put,大升會short call，形勢在上升軌唔做期權，直接出貨。

大家可能會問兩者誰可取，或者套用Starman所講動態同靜態，靜態在長時間應該比動態好，貼市一定動態，不好處浪費時間，我朋友因爲要照顧自己女兒，所以無工作全職做股票期權，當然資金要多才夠一個月工資，朋友行之兩年都無問題，有時間看家的確一舉兩得，相反本身有份不錯職業，當然靜態好。

股票期權

我轉了在IB做股票期權，費用每次23元，比係其他最低消費100元平很多，可以斬開做，做不同價位，現在開始做9月份股票期權，資金要夠三個月交易量，轉了股票做buffer，暫時每個月收10000左右的租，金額用了3分1，朋友話要300萬才夠運作，我都預這個金額，最好唔用盡。

1000萬財務自由

最近才知1000萬係大多數人財務自由目標價，本人不計自住樓還未達標，10年前我認為300萬夠退休，十年後係兩回事，1000萬保守回報有6厘，一年有60萬，月入50000，生活幾鬆動，有淨餘可以再投資，我老師說當目標達成，要轉向保守，要保住筆錢為要任務，離這個數可能要工作多幾年， 除非股票爆上，友邦見紅底就差不多，呢10年投資現在知道投資是一世都要做，買一隻股票預守10年，還要不買錯，我最近入北京金隅，預要守一段長時間，數量不太多，免自己守不住，計雄安收舊樓要一兩年時間，基建才開始，我希望5年有收成。

新動態

我最近出手入新世界, 兩天就升了, 我再等回些再入, 另外九龍建業下月有樓花賣, 地點簿扶林, 港島區, 單位以細為主, 不知賣幾錢? 最近股價都微升, 加上今年始創中心全租出, 我會繼續持有, 希望增加派息!

除淨後我有少量買入恆基, 增持地產股, 友邦在柬浦塞取得保險牌, 柬埔塞被睇好國家, 港府今年都輸入柬埔塞外傭, 市場很缺人手, 該國年青人多, 有發展潛質, 友邦在該區可帶來增長.

現在恆指不是低位, 手上貨很多, 我們在猜股災什麼時候到? 我經歷2015股災, 應該不會很恐慌, 現在又不是大牛市, 酒樓不太旺, 又無唱通街, 可能係今次只升強股, 無這類貨又怎賺錢?

成為巴菲特

昨天在YouTube 睇成為巴菲特，片長達一小時，說他喜歡數學，想起老師都喜歡數學，原來喜歡數學的投資有優勢，巴菲特提到愛因斯坦說複利是世界五大奇蹟，我都希望自己能做到，要產生複利是有條件，首先不能一次正數，一次負數，還要長時間保持正數，叠上去，我相信十年時間是需要，巴菲特曾有金句如果你不能持有股票十年，那十分鐘都不要持有，所以我推斷要十年正數才產生複利，這是普通人很難做到，包括我在內，友邦同越房我持有達三年，都感覺很長，我希望能堅持十年除非遇到大牛市，我記得保險單都是供十年不用再供，保單會自行運作，舉一反三道理該是一樣。

持有股票達十年一定要很熟悉股票，你能跟不了解的人相處十年嗎？我認為香港值得持有十年該兩電一煤，地鈇，港交所等，現在領展應該有條件，香港電訊都該有能力，其他不知有無人有提議？我相信三人行必有我師！

複利收成期

2017年話咁快過接近半年，上年股息估計收埋6月份左右都收了9成，來緊就係半年業績，從2008年上投資路快十年，記得帶著按揭的資金上路，初期我是行路，真是一步一步行很吃力，我相信唔少人會放棄，過了一段時間我換了腳踏車，雖然都要用腳踏但快少少，同時省力，又過一段時間我換了部駕駛車，只要控制部車，唔使出力都行，輕鬆多，再過一段時間我唔再駕駛，轉乘火車，上了列車就自己夠時間就開車送到目的地，可以坐低欣賞沿途風光，聽下音樂，現在我開始轉乘高鈇，很快就到，以上情況就是股神巴菲特所說複利效應。

複利要耐性，時間是你好朋友，隨著時間過去威力很驚人，當時我覺得無可能，因爲頭幾年感覺不到，但在某年點算一下，不知不覺在增長，漸漸非常快，有時候都跟不上。開始體會越早開始越好。

越秀房託

我持有越秀房託比例都大，所以每年報表我一定跟進，在2012年協議補貼巳經完結，還有越秀房託需發行單位去還尾債，協議是用4元發行基金單位，分數年發行，即是會攤簿現有單位，所有物業會每年以20%到期租約，續約應該會加租，但能否抵消再發行單位，我不太清楚，所以我一直都沒將股息再投放在越房，轉而購入豐樹大中華，我在想將舊債用發行基金單位抵，負債會下降，如果越房能短時間可以找到投資物業，增加回報，那現時息率影響微，其實我分析財務報表都是小學程度，未知是否準確，相反我對豐樹大中華回報保持比較有把握，該基金都會保留10%不派息，越房反而派突，不太理解，越房管理不是 不好，所以我都沒放，抱觀望態度，畢竟我買入都數年，以我買入價都有8厘，但要增持我又覺得4元才考慮，因為新發行價是4元。

太極理財

我兩年自我製造生活投資，將日常生活消費配相關股票，用來對抗未來通漲，用電買電力股，煤氣買煤氣股，通訊買電訊股，樓房買收租成份股，交通可買交通股，只要買夠夠覆蓋你使用費，以後跟通漲走，暫時都未脫離我使用費，我相信未來行之有效。

我學太極多年，一直都想將太極核心套用在投資理財，太極講陰陽，虛實，同剛柔，舉例天如果不停放太陽，那地球萬物受強光同熱所傷害，所以有黑夜，黑白交換，世事萬物都存在兩極，陳式太極拳有謂五剛五柔為妙手，我將這概念套入理財上，數年前我精心挑選了兩隻南天北轍的股票，就是友邦同越秀房託，只要有投資都清楚兩隻股票，先說友邦，友邦是亞洲區龍頭保險股，保險是下半生會購買的保障，相當穩健，國內令到友邦不停增長，但友邦都有缺點，就是現在經濟環境，令到投資盈利不穩定，派息比率低都是弱點，長期持有但現金流弱，我就這弱點配上越秀房託，房託主要收租，將扣了營運成本後盈利九成派俾股東，由於收租很穩定，所以現金流上落不大變化，缺點就是沒增長，因為物業單位是固定，很難增加，只跟通漲走，越房房託最賣點是廣州IFC，這種商廈在國內不多，所以收租有保證，兩隻股票成為組合，可以互補長短，經過數年時間，友邦每年股東回報都有過百分之十，派息約1.5%，越秀房託每年有過7%股息，暫時息都有增長，這個組合年回報都接近20%，我相信未來這組合更強大，當年我在想友邦沒增長的話很大件事，加上越房再差有過7%撐住，跟7.2定律，十年有倍升，這是最基本回報。

IB第一單交易

我最近用IB paper trading實習了，終於做了第一單交易，第一單我做了期權，收下租，收美元，其實我一直留意一隻美股，本來想在輝立做買賣，怎料輝立無這隻股票交易，IB有，交易費平，我還想在IB買豐樹大中華，我在等一元樓下，我先知在IB不能直接入坡紙，要先轉美元，再美元轉坡紙，IB說如果用孖展直接買變相借坡紙，我覺得後者會比較好，反正借坡紙息都平，將來收息先填回條數，用得IB一定做埋借貸，息平手續費都平，只操作比較複雜，不過再複雜練多幾遍都熟手， 美股期權到期不是月底，是19號，買美股同港股不同，佢係無一手，可以一股交易，反而期權就計手，每手100，我有唔明白都在google search，感覺知識好cheap, 相反在公司工作，工作不明白，但不知是否競爭問題，上司說你不需要知道，好老實我工作除了賺工資，都希望有其他得著，工資低不是問題，有其他取到都算得著，同事朋友說在公司有挫折感，充滿陷阱，常出錯，做了接近兩年都未知自己做什麼，我非常有同感，所以完成後都不做，我在IB得著反而不及在公司兩年時間，我朋友都說得對，讓番個位俾有需要的人，唔好同人爭，最好笑係請咁耐都請唔到人，應該工資太低咯。

我最近參加blogger Starman新書發佈會，前部分佢講解本書，因為我睇完有點悶，後部分講佢創業，我比較有興趣，啟發我一點，套用在投資，我諗到幾個組合可以增加現金流，在等好時機，組合運作正如我所預期，我又可以抽身做其他事情。

Current ratio, quick ratio

我一向做槓桿都會留意自己組合，同現金流入，同時用兩個比率來控制，很多做生意有負債是最正常不過的事，最重要係控制，在資產，現金流同負債不時檢視同調整，我有做過短期私人貸款，因為息率很便宜，通常年期約兩年，增加我組合流動性，免心儀股票跌到吸引價但無錢去買，私人貸款最弱是還本快，通常投資要一段時間，這時候現金流需要到，如果我未來現金流夠還私人貸款，借貸是沒有問題，我可以在最佳時機買平價優質股，要現金流同貸款接合需要兩個比率助我分析，錢少心中都有數，錢多就要計下數，這兩個比率用來檢查上市公司還錢是否有問題，如果周轉出問題，小則要外出借貴利去還錢，因為唔還錢俾銀行會影響以後信用，同俾好貴罰款，沒擔保貴利可以去到幾十厘，特別在國內，你地會留意到內房發債可以好好息，十厘八厘一定有，因為相比向外借幾十厘，簡直係濕濕碎，我在工作期間都見證了聞名九出十三歸，以前唔明，現在當然完全明白，事情就是這樣，因為公司要錢發工資，借一百萬，借據是一百萬，但只付95萬，下個月同一日要還100萬，到時還需要錢重新立據，又是借100萬俾95萬，再下一個月又還100萬，是國內發生，究竟俾幾多息，國內叫5分息，我點會識，我用番數學同會計知識，我計完年利率60厘，我當時問自己有無計錯數，作為管理我會發聲，結果高層回應國內很普遍，叫我咪老土，我心想利率同老土有關係？ 今日我呢類負債叫小兒科！

優化槓桿

我本身有用少少槓杆投資，就是加按物業，佔樓價兩成，現在物業好值錢，但影響現金流，加按當交租，投資資產回報可以連本都還埋，自從我知道有不用還本方法，我好努力操作平台，又幾體貼，有埋paper trade俾你試到識，投資不同品種，仲俾100萬美金你試，我覺得不用還本要對投資有好充分了解，對報表分析好全面，一個股票波幅的熟悉，先可以進行，而不是零投資知識就做，有槓桿就像坐在汽車比較快到目的地。

交叉貨幣

我在研究IB, 佢有個表係各國貨幣借款利率表, 由於我最近買豐樹大中華基金, 個回報我幾滿意, 坡紙上落不大, 想借坡紙買, 用得IB係鐘意佢息低桿杆大, 唔使下下100%錢入100%貨, 盡量運用每一元, 由於今日是假期, 未問到點操作?

我想像情況1係將港元轉坡紙, 這樣佢會出現坡紙購買力, 我跟購買力入貨, 出現負坡紙, 達到借坡紙目的?

情況2 我不理直接用港元入豐樹大中華基金, 結果會不會是借港元, 港元息口貴過坡紙息口

不過我唔打算咁快入貨, 5號除淨, 除淨後見佢過去都係跌, 所以我等得. 這段時間我可以搵到答案!

自從看到blog友Starman新作, 融資買債劵回報不錯, 但債劵唔係我專長, 房地產信託我比較熟, 佢賺回來息都是買房地產信託, 債劵一般都是3至5年不等, 優質息率無肉食, 又怕息率升同唔還錢, 因為佢有保本, 風險可以控制, 但三至五年抗不到通漲靠桿杆來支持, 買房地產信託係有價格風險, 不過10個百分比可以控制到, 坡紙我番看10年都係10個百分比上落, 只要捱到幾年, 個風險就無咁大, 收到坡紙息可還錢又可再買, 到時睇情況, 所以這個組合包含了港元,人仔同坡紙, 因為資產有香港又一城, 上海同北京收人仔租, 債劵我真係要有時間慢慢學習. 暫時都係唔好買住.

其實Starman都提到組合因人可以變動, 最重要係基本功, 對匯率, 同股票基本層認識, 有些人可以冒高一點風險, 有些人就要穩陣.

最好資產是最好朋友

政府計劃的年金, 市場出了很多年金來打敗政府年金, 老師在文章用100萬自製年金, 當中有匯豐, 領展, 地鈇, 港燈同中電五位好朋友, 各佔20%, 呢5位好朋友同具有成長同派息穩定優點, 可以有穩定現金流同成長, 抵抗通漲, 不會死後歸零, 可以世代相傳, 我只同其中兩位做朋友, 好朋友未必適合所有人, 每個人都有自己選朋友條件, 作為終生好友一定要具備以上兩個優點, 我好朋友比較多, 要看顧我生活每一個環節, 大家搵到陪你終老的好朋友嗎?

累積

今日星期六早上將手提電腦大掃除，將無用軟件剷走，部機很慢，再進行磁碟清理，足足玩我兩小時，我無浪費等待時間，將部音響駁回新電視機，要兩個人先可以做到，個姐姐忙於買菜，又要等佢回來，又在等待期間睇書，當然睇我新買證券分析，早前同老師食飯，佢話股票市場97%人係蝕錢，只有3%人係賺錢，我相信我是3%的人，未識佢前我係牛2入短時間抄一筆就走人，兩次大牛市都走得切，至於邊個教我買股票呢？我真係唔太記得囉，我阿媽係我阿爸教，話工字不出頭，叫佢買下馬票先發達，馬票消失有六合彩都未發達，所以會不會影響我，我阿媽轉賭馬，抄外匯買金咁，應該係佢影響我，到最後意識到退休問題，先長期投資，投資是一條很長的路，不斷滾存累積，錢累積不容易，要使哂好容易，相反電腦入邊都唔知點解積埋好多野，拖慢部腦，剷佢又要花長時間，投資壞組合當然要剷走，個組合先可以暢通，每一個人投資組合最後累積好多唔知點解會買股票，變質投資會拖慢組合表現，仲影響埋現金流，要抽時間同精神再整理。

你們組合是否同我一樣呢？

九龍建業

新投資項目九龍建業, 這一支證劵跟現在恆生指數平均市盈率接近13倍有比較大折讓, 原因是始創中心德爾斯結業有關, 因為德爾斯佔始創中心都不少比例, 加上不是租約期滿, 應該有很多問題跟進, 最新年報指出巳經在2016年12月底租出, 德爾斯前身為宜加傢俬. 當年始創中心層次比較高檔, 現在比較迎合國內人需要, 感覺比又一城, 海港城同APM層次上低些, 可能地區近深水埗, 而中心對面是中港巴交匯處, 感覺浪費太子這中心點!

另外一點做成大折讓就是子公司保利達一個黑沙環地盤被政府因期滿無條件收回, 事件擾讓超過一年, 經我找來資料該地盤是25年前澳門讓保利達發展製衣業, 因為我之前做過製衣業, 有時因為配額問題需在澳門加工, 記憶中澳門製衣業一直都做不起,
該地段保利達是沒有成本投回來, 最大問題是2006年改用途, 因為政府問題而拖延工程, 同時保利達巳經賣樓花, 我奇怪澳門政府明知地段有問題, 還批出樓花紙, 銀行又做按揭, 看保利達財務報表該地段賣樓花的錢是沒入帳, 做成市帳率超低, 市盈率比較高, 而保利達另一個黑沙環地盤將於2017年完工, 有關帳目於2017年入帳, 同一個問題出現兩個不同結果, 一個可以如期交樓, 另一個地段出現一批苦業主, 我留意該地段跟九龍建業持有土地是很小比例, 加上不是直接持有, 我工作經驗公司有子公司是因為不想影響母公司而安排, 又或者可能澳門做生意的要求,所以對九龍建業影響不太大, 這件事澳門政府應盡快解決, 畢竟是有收印花稅.

至於九龍建業有始創中心提供穩定現金流, 持有大量國內土地, 人民幣持續貶值, 資產會隨之漲起, 香港土地相對較少, 不過近期主席私人買港島區舊樓, 將來收樓真是不錯投資.

分析後可能不太全面, 因為找信息不是容易, 我還親身到始創中
心視察一轉, 人流都算不錯, 因為現在不是國內假期, 相對都算不太差, 今次分析學到唔好買樓花, 出了事苦主奔波, 最後好不好都折騰身心, 金融海潚出事都係迷你債主最傷, 分析最後是否附合預期不可知, 只知道時間長變數會出現機會率較大, 我讀了少部份證劵分析提及, 還有債劵所舉例子, 不過我對債劵認識太少, 講了都不明白, 息率5厘, 到期息率可達9厘, 債劵面值無提, 只說現價60美元, 或者明白債劵一睇就明白, 但我不明白囉!

政府辦年金

剛在電視聽到政府推出年金計劃，年達65歲投100萬即時可以每月收5000左右，因男女收年金有不同，我取中間數，話說我兩年前買了月月收息基金，我大約投放55萬左右，因為有紐元都是一個約數，我每月收4500左右息，個本仲有機會續回，唔似年金無得取回，係俾到你死那天，如果現時65歲有100萬本金，我相信無得攞長者生活津貼，長者生活津貼現在約2000多，好像有機會過3000，呢條數我都唔識計，因為無人知自己有幾長命，5000元十年後可能唔夠使，到時點呢？ 長者津貼又無份，另一面長者生活津貼會不會收回？

我覺得將來生活都是靠自己，所以投資是很重要，我早前說生活股令你可以晚年不會被通漲侵蝕，學投資越早越好，我自己都覺得自己遲了，時間是好朋友，複利需要長時間產生，說真我不喜歡投資，但都要學習，那些書好悶，但為了自己晚年，辛苦都要，投資最難搵對投資目的物，好像普洱茶一樣，個茶餅品質差二十年後無靚茶飲，所以選種子好重要，望住證券分析我又要辛苦一段時間。

忙碌工作

呢排工作很忙，收工都無心機寫文章，不過倒為了假期安排一些活動，明天去行山，地點係鰂魚涌到大潭水塘，我最近買了中譯本證劵分析，共4冊，我相信要一段長時間去吸收書中知識，我睇了數頁應該有會計知識會比較易理解。

我最近都入了一隻股票，我是有看報表才決定買入，打算長期收息，不如估下我入了邊隻？有貼士，有中港澳地產，在香港有個商場收租，還有石油業務，股息率超過6厘，多年派息幾穩定，負債不高，儲備都足以還負債。

咁多數據證明我有做功課架。

收縮資產負債表

昨晚聯儲局聲明提出收縮資產負債表, 令到美股市由升轉趺, 當然大家有印象美國牛市最長, 足10年, 另外就是樓市, 至於怎樣縮減? 我認為會將到期債劵收回,不再蓋冚蓋, 估計約5年可以減到幾成, 到時水減少, 市場會加息.

這10年我認為最受影響一定係樓資產, 其他地區唔講, 單香港沖擊不細, 最主要是港元同美元掛, 美國樓影響不大, 因為都無升過, 美國其實10年量化多了錢無流入美國公民, 只撐起股市, 股市根本不是窮人遊戲, 香港人就在10年出了財務自由這目標, 狂買樓收租, 憑利率低一層叠一層, 至於股票就沒有樓咁高潮, 多謝大戶愛CHOK市, 我估計對股市影響不大, 倒是借貨沽空成本高, 舞高弄低要成本, 可能利率正常化, 股市未必會CHOK, 歷史加息股市未必趺, 初期是有短期影響, 在24000點我都沒有短抄同做股票期權, 手持一筆現金等運到.

不過縮表是否真實才是最重要. 大家有無留意地鈇最近竟然有吉鋪, 我印象中地鈇有商鋪都未吉過, 最近抄人消息多了, 經濟似乎差很多!

投資各師各法

我最近有參與股票期權時間剛兩個月，只賺7000元，覺得都幾花時間去跟，賺這樣利潤，我反而短抄股票有收穫，收息股我現在都好少睇，因為長期收息都不會賣，除非惡化先再算，我有一筆平時短線操作，都幾影響工作，現在24000點，股票唔係平，亦買唔落手，股票期權在這水平做沽家接貨機會大，所以四月份無做，打算暫時持有現金，等回調先再入，睇完鐘記新書，發覺只港交所可以留意，現價都貴，我早前180入一批在200放了，下次我等180先入，友邦我都長期持有，唔會再買，我覺得唔夠料分析最好買盈富基金，係低位入高位出，應該有超過10%回報，唔會睇錯股，方法簡單易用，所以來緊我都用這方式操作，估計一年出入都是一兩回，取回生活質素，做自己喜愛的事。

Ib我都未掌握到，債劵現在選擇不多，感覺時不與我，還要槓桿，我暫時會擺低，慢慢搵資料，債劵時代應該係黃昏，不過總算認識多一項工具。

IB 開戶

最近忙於操作IB, 相對銀行輝立明顯有難度, 去網友參考下, 睇
下短片, 可惜英語廣播, 昨夜睇了兌換外幣, 因為IB叫我入金是港元, 自己在系統轉, 發現要起碼轉25000美元, 因為我入金不多, 做唔到, 仲要有收費, 下次直接入美金. 多謝70S網友教怎轉倉, 我仲計緊轉多少buffer, 接下來要搵債劵資料, 見網友好詳細,
我用scanner做唔到佢地介面, 今晚再研究下, 看來我有排練, IB話有課程教多數二,四中午即要請假, 月底要埋數, 自己玩下先到時有問題可以問, 唔急得!

上講座

昨天請假，個朋友搵我上期權講座，免費，再深入要俾錢，導師講幾個成功例子賺好多倍，我都算做了兩個月股票期權經驗，做Long要找一隻一個月內會爆上股票，俾期權金，一個月磨都要輸錢，但導師可以買一日爆十倍，就是700騰信，佢係180多買，很短時間就上好急，還有中國建材，呢隻係買正股，好殘價買，幾個月就上五成，佢用這情況叫殘價，鬼唔知殘價，什麼係底價？佢話有數計，當然要俾學費，有些例子神乎，我最後當然無報名，因為神的行為我自問凡人點學都唔識，失敗無例子，仲唔係神？

我多數做Short, 因為最多接貨同放貨，我朋友用三球作資金希望每個月平均有五萬，我估計約年回報百分之二十，應該都是中級難度，我現在入一隻都有百分之十五回報，唔好忘記我是初級，現在集中港交所同新世界，可以做股票期權約約80多，其中有很多唔流通，集中火力係流通量大股票，跟進，至於找殘價，個導師講有用基本分析，睇報表，找出位置最高點同最低點，有時候買了等好耐都唔上都有，所以我都唔明白咁準，有時候太完美信服性會被懷疑。

股票期權三月份

離三月還有兩星期，今日平了一隻，下星期希望平到剩下，我未打算開4月倉，恆市現在都算高位，等調整先考慮，剛開了IB戶口，今日上去簽名入票，應該星期二先開通，個介面好像好難，剛學識輝立又要轉，又要熟悉新軟件，我見IB有我想買美國股票，輝立仲話等老闆批，希望轉新地方係最後一次，轉到好煩，IB所有都要自己操作，入金要上網通知，所以先可以收費平，我打算熟悉些先再轉錢，佢運作只一個戶口，輝立就股票一個戶口，期權一個戶口，期貨又一個戶口，錢要轉來轉去，不是電腦操作，係打電話去轉，係快但又係好煩，股票轉倉唔記得問怎轉，係IB網上開戶都試好耐先做到，入慢些都掟走你，我寫低哂一口氣入唔好諗否則又掟走，我前後試了過五次，終於成功！ 今日上太古廣場簽名，其實同在輝立都差不多，佢只一間辦公室，不像輝立有門市，IB好電腦化，感覺好專業，佢話可以上課，但都是辦公時間即又要請假，我情願打電話問功課，我諗唔會差好遠，現在股票期權每月在收租，磨市最好用股票期權，大上大落一定要接貨同放貨，好處知自己賺蝕有限制，唔好處都係有限制。

開始做資料庫

投資股票多年，一直都看書，參考其他人投資經驗，數據都是東取一點，西取一點，所以想做一個自己合用資料庫，想知道恆生指數各股比例，市盈率同股息率，要到恆生指數網站取料，想知某行業就要到有分類財經網，發行股數要到香港交易所搵，不是所有App都有，可能有人會話google財經有哂數據，好像點菜會出來，某隻股票有五年報表，我其實都不清楚是否同上市報表一致，是否有專業會計做這數據出來，我比較覺得自己做會為我想知合身些，可以俾自己了解各行各業，工程都幾大，無一段時間都做不到，想就天下無敵，做就有心無力，我終於的起心都開始，先用試算表設計我想要資料先，再輸入股票資料，逐個項目做，終有日會完成，星期日工人放假我留守在家可以動工，平日要上班比較難，估計進度都不快，今日總算行第一步呢！

投資組合收成中

一月底業績期展開，我的組合香港電訊信託，越秀房地產信託，友邦巳經出業績，相比去年息率三隻都有增長，餘下有港燈，煤氣，載通，泓富同豐樹基金，希望能提供穩定息率，星期一港交所我是短抄，剛有貨在手，我估計差不多，我都不排除短期會沽出，我最近入了中國機械工程，可惜買後轉跌，有機會等到公布業績，我手上股票保持10隻左右。

接觸期權後感

在過年前我開始接觸期權，股票期權以每個月合約定價買賣股票，沽者做莊家收期權金，有接貨風險，對家付期權金，以不接貨同不付貨利潤最高，收期權金最理想找自己想持有股票，原因是你在股票市場買後都不保證你買價最低，買後再跌機會常在，當你手上有股票可以賣貨，當然是你達到理想價錢可以放出去，心態是不急，收了期權金真上到你定價，以合約賣出去，這種交易只有證劵行才有做，經記說接貨唔夠錢可以分期，利率都好低，供期間夠價可以放出去，非常有彈性，一個月下來，平時都會佔我時間，要分心，好處可以有少少收入，覺得忙碌，有點影響平常工作，我練拳通常都是假期，不算很影響。

至於我以前方式大比例是房託同公用股，通常都唔會理會，到時就收息，增長股只持有AIA，
最近喜歡港交所，因為獨市生意，大牛市港交所一支獨秀，所以不錯，銀行自美國量化我都無買過，息差窄，邊有錢賺，上市公司從財務報表借錢都不過三厘，要交租同人工還有好重要資訊處理，美國唔加息銀行有排捱。

我現在目標是儘快降低負債，股票股息達到每年有半球，目標還很遠，達到後我可以做自己喜歡💓的事，閒來練拳，想想都好開心！

業績差

今日恆指重磅匯豐成績表出世，業績比大行預測差，我自賣出都無打算買過，因為美國加息得個講字，真係加息先再想，係未達到正常息率，銀行要捱寒流，做製衣永嘉都發盈警，今年仲好少單，我有親友做製衣配料，過年見面話無單壓年，聽到心寒，我朋友話我轉身快，我重申我無水晶球只是家事離開工作多年的公司，打算退休，只是後來出來再工作，意料之外。

永嘉除了加工成本增加外，零售都不濟，應該說很多零售都會差，朋友話食飯都少了人流，道聽澳門都好靜，我在想現在恆指市盈率達12倍，但盈利縮好多，市盈率會不止12倍，星期五接力恆指重磅股友邦，我估計盈利會有增長，因為宏利都有增長，應該差不多，但國內管制資金外流，來緊新業務增長可能會減弱，現時只有地產同保險盈利會比較好，我打算除了Reits外其他股票要減磅，增持現金再作打算，下月國內企業成績表接力，我認為都是不要太大希望，分分鐘恆指會回到20000點樓下都不出奇。

開源節流

自從今個月開始股票期權, 產生多一個現金流項目, 我現在有REITS收穩定股息, 短抄一些即興股, 再加收期權金, 資金變得珍貴, 因為資金係投資籌碼, 開始節流, 二月份產生5位數期權金流入, 下星期開始三月份開倉, 我都開幾個, 發覺要記錄交易, 我開始好亂, 月結單用電郵, 收完望下就算, 感覺不太好, 用硬件方便些, 用試算表要開電腦, 好煩, 因為我用筆記,型電腦, 未設計點記帳?

港交所

早前購入港交所, 突然爆升, 我仲等緊穿200大關, 叫緊大牌, 有大時代價就相當和味, 今個月做港交所認沽巳經所剩無幾, 平倉要俾費用, 由佢自然消失.

敏華控股

最近趕完工作, 有點時間睇下自己持有股票的財務報告, 首先我選了沽空大的敏華控股, 因為我考慮是否再增持, 2016年中期報告不過53頁, 好容易睇, 負債率好低, 最近被沽空原因是特朗普保護主義, 我放大市場銷售比例, 最大市場是國內, 美國不算大比例, 美國依靠傢具都算高, 應該不會很大影響, 有自己物業, 情況差都有力守, 歐洲都有銷售, 銷售是有點放慢, 但成本控制不錯, 提升利潤, 我覺得營業額同成本是做生意兩大元素, 經濟差但控制成本好都好重要, 可以降價促銷, 報表後公司不斷回購, 收窄股份數量, 對股東是有利, 所以我在低點增持, 比公司回購價更低, 不過這報表年份有問題, 明明2016年中期年報, 何解有2017年字眼, 究竟是我會計退步還是公司問題? 兩個年度比較是2017  2016,不是2016 VS 2015 頭暈!

中國電力股興衰

電力股一直被認為公用股，有買貴無買錯，但中國電力股就曾經歷盛世時期，那些年中國有世界工廠美譽，工業需要電力，所以股價跟派息很理想，有個親友話可以長期持有，有朋友一直說現在有11厘息率，我一直都阻止增持，理由如下，首先中國巳經不是世界工廠，加上美國想自己生產，向進口產品徵重稅，廣東省很多廠家都苦撐著，可能有人話無工業都有民生會用電，無錯全國十多億人口用電多過香港很多，但大家要清楚國內共產黨話事，如果民生出現通漲一定會降電價，話之你會不會蝕錢，加上煤去產能一段時間，如果美國又行回煤生電，煤價會上升，作為電力主要成本，豈不是雪上加霜，美國是否想像華北那樣空氣質素，只有新總統自己決定，至於有11厘是股價跌過龍，出現PB低，係公用股是稀有出現，剛半年業績出現大倒退，所以不要為了11厘去增持，至於電力股能否重拾動力，取決人民幣是否眨值令到有生產訂單，等多長無人知，所以有11厘息都要深入了解清楚，估計下買殘股是否夠長命等佢番生，國策都是影響電力股一大因素，香港電力股享有高PB因為有利潤管制，有商有量，國內點有得駁咀，如果博業績前走一轉，值博率不高，森林還有很多樹呢！

特朗普端倪

一上場新總統很快進行選舉所講的政網 ,全世界對於這麼大改變反應很大 ,

連香港開市都失守, 連今日共三天下跌, 有機會回到22000點 在莊家市講價值投資心理要有一定質素, 我手上一批生活股, 都震到可以用過山車來形容, 要真正價值重視 要散戶有一股很強力量才有機會, 我相信都幾難, 所以我都係只收息抗通漲, 平時都不會睇, 只留意下短抄股.

說回特朗普所講, 我發現了以下幾點, 第一點希望美國企業回美國生產, 會提供稅務優惠, 我在想起碼要減百分之三十, 試想搬來都要成本, 還有美國人工都貴, 如果到時搶工人, 那工資不知要加幾多, 這點美國政府無打算支出任何費用, 企業只提供減稅, 但多人工作工資上漲工人要俾多些稅來可以補回企業減稅. 第二點要墨西哥負擔圍牆費用, 會在墨西哥進口美國加重稅來支付圍牆費, 又係由其他國家找數, 對中國進口徵收重稅, 講到其他國家攞著數, 當初無著數會可以進口美國, 美國當年又不是中國人工平來養美國人, 現在金融海潚反是人地攞著數, 至於起基建現在都未提, 基建要自己銀包攞錢, 海潚時中國自己帶頭起基建, 自己印銀紙來刺激經濟, 大家都等緊呢單大生意, 加息都無哂影, 只說美元太強, 相信大家不要以為會加息很多, 狼來了兩年都係每年一次4分1厘, 一日不取銀包出來都不會通漲到大幅加息, 所以趁狼來了我會再增加現時組合收息股

最後美國係停止買債, 但資產負債表仍然未收縮, 我個人係呢兩年債務縮少了,

資產反而有向上, 因為樓價都高企, 銀紙貶值還錢都不覺多, 因為收息增長了,我經營這盤數都不見輕鬆, 又不是很有難度, 新總統見到美國盤數應該暈暈地, 佢係成功商人希望可以扭轉局面, 美國財困煩到好多人.

生活股電訊

由於香港電訊信託率先公布業績，我看了他最新年報，電訊業競爭好激烈，我發覺佢收入有好輕微下降，我最近換了手機親身到電訊過資料，等過資料居然有汽水飲，我前往旺角山東街那邊，我見佢將門市整合了，感覺不錯，樓下有買副產品像機殻，我因為有時間都去睇下殻，順便為新機買衫，佢機殻對比淘寶質素比較好，較細緻，當然淘寶平一大截，我都買了有布料機殻，報表顯示其他收入有雙位增長，我相信是副產品，將門店切出一部分買高質素手機副產品是不錯意念，充份利用地舖。

在等待期間見到上年紀的老人來問手機問題，服務員非常仔細為老人服務，態度非常好，其實香港電訊服務一直相當不錯，所以收費貴我都堅持用，事實我試過全港所有電訊，始終都係香港電訊好，今期報表在整合上節省不錯成本，我同時取出香港寬頻同數碼通，先講香港寬頻佢負債好高，但與無記合作tvbsuper令到收入大幅上升，另有一點好奇怪，就是派息派突個盈利，我見佢上市兩年，不知是否上市時有派息保證，負債10元有7元是借，雖然佢收入大增，但昂貴借貸成本是否令到純利變得普通，我認為前面講到天花龍鳳都好，最緊要係真正落袋純利，電訊因為成本管理好純利有上升，我認為管理層將收費再多元化，迎合不同社會階層，例如家庭組合，設計多元化，可以取回流失客戶群，有些電訊收到好平以本傷人，最終傷到自己，這些年電訊發散很多牌照最後整合幾間，像香港寬頻用借錢來派高息真是否做生意之道？ 電訊投資成本是非常大，所以要大企業才維持經營，電訊如果再購股，我有機會會選中移動，因為負債不高，在國內有一定地位，香港寬頻我要看最新報表先有得講，但香港很快進入加息期，選負債低是常識，否則借貸成本會擴大，現在是以本傷人，兼派高過純利的高息，雖說借貸投資是生意的一種方法，但要用得其所才有大得益，香港寬頻很快出業績，我會再跟進！

適時進修

香港過年氣氛都是一般，拜年指定活動，我喜歡靜靜看書，特別會重溫投資書，我覺得書不同時間睇都有新體會，美國總統上場正落實競選時所講改革，如果順利的話，加息預期會加快，資源股如絕地重生，相信Reits會像潮流一樣會淡退，當然如果息有一定吸引力，可以增持，通常我買都唔會放，保持現金流。

股票期權在進行，全部都在二月份到期，很多人叫收租，我趁假期整理一下思維，想下怎管理新項目，股票市場現在都是莊家主動，散戶不太多，所以唔好太進取，長線照不變，短線有一定百分比就收割，我年三十入路勁基建，進貨後股價上得幾快，我只入心中數量的一半，留錢玩收租，玩多一項真是要好好分配，還有時間，我朋友叫我全職玩股，我覺得工作收入穩賺，有得做都做住先，佢話現在打工都不易為，我不否認她說法，現在份工作唔好打，不過我希望堅持最後一刻，畢竟期權開始一個月都無，我要半年時間觀察我成績，我是非常有投資興趣，不然都不會放長時間去鑽研，練就一個好心態。

股票期權新體驗

話說我在證劵行供緊星加坡Reits ，有股票期權，今日開始玩，程序好複雜，記住call 同put，
好多要重新學，今日SP港交所，收了期權金，二月就知自己使唔使接貨，又開多辦，真係忙好多，我會撥少少資金去經營股票期權，我短線中石油有少少升幅，未想食糊，短抄幾隻今個月都進帳少少，長線維持收息，下個月有好多業績出，希望息率有增長！

抵買嗎？

今日股票是否抵買？好多時會參考恆指市盈率，代表是否抵買？最近市盈率11倍多，息率3厘多，我心目中抵買是10倍，息率近4厘，如果問我樓價是否抵買，現在當然是天價，我認為中原指數達到100或下，可以考慮下，起碼應付到供款，經濟環境差怎面對未來遙遙長路供款，過新一年很多又貴了，昨天買年花感覺比以前平，以往我都要花過千買蘭花，今年不用700進了兩盤，係細盤但有兩盤花，心理覺得平，全盒望落質感不像平價貨，都是100鬆，舊那個用了好幾年，換下有新鮮感，唔係新一年貴咗咩？係日常生活好像車費好貴，家下出去要諗下怎樣行程才節省？好像早前電訊公司通知取利是封，如果唔諗就出去旺角取又一個來回程車費，因為後幾日要到旺角做天灸，到時再取利是封，港島區要一次性收集才出動，要計劃好行程，如果係一個地鈇站就選行路當運動，外出吃飯講到食得下都要60到70元，有時100元都有機會，水果唔使講都好貴，街市買一餐晚餐都要過100元，現在100元唔買得好多野，總之唔見使，人工唔見得加得快，可能有機會減值，當你轉工搵唔番舊的人工，加班係必定，工作量包埋點快都一定要超時才完成，做文職現在搵唔到錢，唔投資唔學投資真被通漲浸死了，街市現在年輕化，阿媽年代覺得讀書有前程，現在做地盤賣魚賣菜先搵到錢，肯清潔洗碗仲天價，花幾百萬供下一代讀博士會蝕到入肉，幾萬人去爭高職位，你要表現幾萬人中最吸眼睛，仲難過中六合彩，下一代有幾辛苦不敢想，因為要同人工智能鬥！

眾籌

現在眾籌很熱門，剛看完電視比較詳細介紹眾籌，還有很爆黃秋生廣告，了解完是一個網站，有興趣的人可以將一個項目進行籌錢，可以有一個生病小朋友想到歐洲旅行，可以透過眾籌籌集旅費，節目是取武術界眾籌，籌款將武術透過三維紀錄下來，傳統不至消失香港，項目可以多元化，最後項目會有機會不能完成，所以都有一定條款打包一起。

好像我八年前很想財務自由，一個工資不多的會計可以怎樣達到？當時沒有眾籌，我只有一層自主樓，我按俾銀行取了一桶金作本錢，現在回想都好大膽，失敗連樓都沒有，但我當時只想財務自由，沒有多想其他，其實過程都不是很順利，要落手落腳去試，遇到問題要想方法解決，一關一關打過去，現在由負一桶金走到正回報，如果現在由手上的本錢從新開始，未來會怎樣我不太清楚，比當時輕鬆點，對股市有經驗，波動對我影響減弱了，我在想今時這個本金要像八年前滾動，我想我應該更富足，諗諗下又覺得不可能，當初又好像想想就走出來，念力有時是想像不到！

業績期

我個組合第一隻出業績是香港電訊信託基金，今次股息有增長，非常興𡚒！即是生活對沖股發酵，港燈今次慢了，我希望收息股保持增長，因為日後的生活費，稅貸巳經結束，即是資產同負債的距離又遠，負債少了資產增加，現在應付分期付款的星加坡股票，我將股息再買入滾存，到11月我又供滿一個負債，多了一件資產物，這游戲很好玩會上癮的。

入貨中

昨天今天買入港交所, 破例在1字頭趕尾班車入騰信, 買入很少, 純玩下. 隻石油股升得不錯, 很多人買期貨, 好CHOK, 係CHOK中前進.

如何理解價值投資

在十年前我學習太極拳，為何我對太極拳情有獨鐘，在我小時候我每天都到工廈，因為家母替工廈內公司包伙食，我要過去食飯，早上我會見到電梯員在練太極拳，當時電梯是有人按樓層同拉閘，電梯員是年老的阿伯，每天早上會練一遍太極拳，時間約一小時，所以印象深刻，他沒有現代美姿太極拳，練傳統太極拳，他練得很悠閒同氣定神閒很吸引我，我那時候很細根本 不知道那是太極拳。今日我當然知道，這是不容易的武術，要全身協調，我跟隨不少師傅學習，當我人生在低潮時我會練太極拳，有些人會選擇信教，但練拳令我心境平靜。太極拳師傅因爲用大量時間在練功上，多數都是比較窮，在理財更加零知識，有位師傅問我怎理財，要讓一個大半生奉獻在武術師傅理解投資，比較有難度，我該怎樣令他明白呢？他知識是見抄股的人常常買賣，又不清楚股票背後公司，我終於想到怎教？我說其實你一直在做只是自己不知道，師傅身邊有過百徒弟，都是師傅用很長時間收回來，他選徒弟有準則，人品性格都要考慮，往往觀察數年才決定，一旦決定收這名徒弟是終生，不會隨便出師門，當這批徒弟年長成熟會自己收徒弟，那麼數字很可觀，師傅將徒弟變成一間公司，徒孫是盈利，師傅老年應該相當富足，不單桃李滿天下，財富足夠晚年生活。

奧巴馬年代

當年奧巴馬宣布量化，我當時知道錢不再保值，我隨即買樓，買股票，今年奧巴馬要交出總統之位，新的總統不似預期，大家都等待新總統上場，新一任總統能否令我投資更上一步，假如能做到，那樣投資經驗是有長進，我當然希望什麼時候都找到投資方向，當新總統未上場，我買入中石油，開始有正面盈餘，但我希望等到油價上60美金再打算，石油是周期性股票，無打算長期持有，例子有股神巴菲特，股神有好油價都放售中石油，今年有人說股災年，那樣要來個大升市才可以有股災，我都在等待中。

一年之始

當我總結了去年的成績表，新一年該怎樣開始，今日我重買新世界發展，因為年中尖東會出租，停止基建支出開始收租，我還要再觀察，我去年入一批石油股還要多看一段時間，新總統上場會明朗化，我最近買了一本書主要教睇財務報表，雖然我是會計但仍需學習，多年投資經驗我還是覺得很多東西再學習，大家有沒有看李家鼎的阿爺廚房，那才是功夫，我都希望我投資知識像他一樣根基深厚，一步一腳印地走，遇到白天鵝黑天鵝都氣定神閒地投資。