六絕是否出現?

來到六月是否有六絕? 昨天在最後一分鐘成交達300億, MSCI換馬引至, 市場將A股入MSCI預期升高, 昨天國企造好, 我最沒有再掃貨, 反而恆市每升一倍, 會減持, 即是約23000點左右, 還有一大段路, 今星期會收取港交所同長和息, 又放在待熊基金中, 六月在我看會相當波動, 先A股是否納入MSCI, 深港通是否今年實行, 再唔公佈今年沒有希望. 再來英國是否脫歐? 美國是否加息? 咁多決定問題市場想唔CHOK都難!

我依舊每天抽出時間睇書睇年報, 機會留俾有準備的人!

今日再集郵

今日見美國加息好像很快, 原來想入泓富暫時擺低, 我一個朋友早幾日問我買匯豐如何? 我今日想美國加息對金融有利, 匯豐現在過7厘, 終於我同朋友一起入了兩手, 仲打算將來一齊放, 我諗到60元考慮下放出, 應該有一段時間.

我仲留意近排隻煤氣股有回穩上升, 同時我又留意capital放互太紡織,轉入中國燃氣, 而煤氣最近增持港華燃氣, 燃氣原來係未來新經濟亮點, 因為國內空氣污染很嚴重, 燃氣比較乾淨, 但因為價格問題, 抄完又回落, 今次大孖沙入貨有什麼啟示?

核數師重要性

我近期買了鍾記書籍, 佢提及到買股票前先睇下邊間核數師, 可想而知核數師操守幾重要, 當然我地投資者睇年報來投資, 如果個報表失實, 我地分析都會跟著錯, 作者建議最好係四大會計師樓包括安永, 畢馬威, 德勤同普華永道, 原因佢地太出名無必需做壞招牌, 這同時證明買野要買龍頭, 像新鴻基地產, 佢起樓料靚, 我都鐘意佢樓房, 但奈何銀紙唔爭氣, 佢樓有捧場客, 我都希望有日換到新鴻基樓, 回到正題如果係四大核數師把關, 盤數可以睇落去, 不然唔好買唔好再睇, 呢點投資學問我第一次聽, 我之前好少人會提及, 所以我都會睇很多不同人的投資方法, 說實在很亂, 所以我係度寫低我投資路程, 某年某月某日我得到一個新經驗.

退休建倉

今日睇i money林本利博士文章, 提及現在是建退休倉好時機, 他著作我都有睇, 覺得他是非常保守的投資者, 應該說很很保守, 今日見佢在恆指成份股選了約十隻, 恆指內中國股票是一隻都無, 應驗我所講國內股票唔適合退休人士, 如果你在佢好低位入, 仲要有好好耐性, 又一個唔好彩係高位入, 跌幅可以好大, 可以跌50%, 息幾高都冚唔到, 所以咁多股票又何必選佢! 其次避開妖股,妖股好容易睇, 佢價格唔高, 方便造價, 你可以從歷史睇佢有無又拆又供, 又會將唔好資產賣俾公司套現, 妖股比國內股更差, 翻生無期, 將股票貼牆紙可能都係一種特色, 還有新上市股票, 除非間公司非常好, 不然起碼睇三年報表先決定, 最近一個經驗, 去年中國imax上市, 我真係幾睇好, 股價都很高, 因為我覺得電影係國內市場好大, 基於我睇過書, 說新股要睇幾年業績先好考慮, 寧願買貴都唔好買錯, 今日我抺汗, 個股票跌很多, 我會跟進佢往後業績先決定, 唔使急!

又講回林博士個倉, 竟然無煤氣, 但有國泰, 國泰要等油價平先可以買, 匯豐我覺得真適合退休? 我有朋友60元買, 收息冚多長才補回, 最近係美國可能加息, 叫做利好匯豐, 最令我擔心佢失驚無神又美國唔知咩省告佢喎

佢個倉都有60%我認同, 不過我覺得倉要配合主人性格, 我非常認同佢講法, 股票實在太多, 只好花時間係恆指搵十隻你喜愛股票長期追, 做得恆指成份股都有個譜, 但有例外, 像過去利豐, 今日百麗, 因為指數成份股都會變酸,  你最好好好了解這10隻股票, 知什麼時間入, 長渣或放出, 業務前景, 那你可以更多時間享受生活. 其他美女等其他人去揀!

今日行動

今日我繼續行動, 入了一手新地016, 我留意佢最近賣樓, 今年應該出盤多, 索性入一手, 我又集郵啦! 今日收到電訊信託基金股息, 明日是友邦, 集齊又可以集郵, 隻泓富地產信託基金仲未到我心目中價, 下個月美國加息之聲很近, 應該會回落, 加息對reits很敏感, 還有石油回到美元50元, 港燈都回落, 載通都一樣, 燃料上升對交通用電好敏感, 但加息對保險股是正面, 金融都是向好, 個市今日500億成交都無, 無人買貨, 是否巳經見底? 莊家再沽空都無著數, 賣都賣哂, 像我集郵好難棄股除非個業績轉差我先放棄! 

今次升幾多?

早排見莊家動作, 牛熊證有200點距離, 純莊家造市, 魚缸實質無魚, 成交額好低, 莊家自己玩手指, 隨著美股升上, 莊家反手殺熊, 係香港市場都要留意莊家動作, 我好唔明白買牛熊證的人, 明知人為因素多, 衍生又係莊家出, 有幾多貨最清楚係佢, 點解仲要同莊家對賭? 不過我地可以執平價貨, 收下息, 我本身都會有個組合, 增長以友邦為主, Reits同公用佔數多, 佢地為我提供穩定現金流, 另外係中資股, 到目前為此, 最差係中資股, 其他都有正增長, 現在我只留下中國人壽, 廣發同南方A50, 廣發等深港通應該會放出, 剩下等A股翻生, 最後一組係短抄, 內容無特定, 但條件係息高, PE低, 同被市場低估, 係莊家橫行時候, 短抄可以增加流動性, 這是我最新戰略!

整理組合

2015成績表出來, 有幾隻國內股票不睇好, 早前入了長和同永嘉, 昨天放了那幾隻股, 回了資金, 加埋今個月收息, 可能睇位入泓富房產信託基金, 或者入新地, 個價真係好平, 佢都有收租項目.

投資血淚史

係2008年我為了未來退休, 踏上投資旅程, 自己做基金經理, 我的強積金不用提, 無眼睇! 其實我不太差, 自成立都有盈餘, 但實在太少, 好懷疑怎退休? 自己08年按上自住樓取一桶金, 上路, 但不順利, 平手走人還錢, 用剩下錢買了一層樓, 3成按揭, 當時巳經連租約買, 不用供樓, 深深不憤, 再按自住樓取下一桶金, 今次一上路巳經賺20%, 其間我買了幾十本投資書, 我諗有幾十本, 到現在我都沒停止買書, 每星期都買I money, 我需要不同人的方法, 我還去經濟學院讀了初, 中級, 高級無讀主要衍生工具, 我既然都選擇了價值投資, 不會浪費時間在衍生, 經過了8年努力, 我都算有成績, 機會留俾有準備的人, 現在回想都很大膽, 去到好盡, 我現在投資經驗都是跌跌下成長, 我都要試斬變酸股票, 這是必經之路, 你沒可能一次錯都沒犯, 股神都有犯錯, 何況我自修!

昨天我媽打買菜回來, 對我說剛在市場遇到抄股的朋友, 現在賣菜, 我媽打好薯仲問人做咩賣菜, 對方說不要問這問題, 一定是去年28000點撻落18000點, 這散戶一定追國內股, 現在肯定一地血, 其實這種情況我見不少, 我有兩個朋友早幾年都係中資股散戶,當時2823升到無人信, 後來好像中國經濟GDP沒有高增長, 中資股跌了9成, 個朋友從此不再買股票, 另一個朋友本來主婦, 結果到酒樓打工, 佢地股票沒有翻身之日.

這種情況我想帶出國內股不是好投資, 如果你不了解國內國情千萬不要投資國內股票, 天堂同地獄一定有機會感受, 正如股神說不了解就不要人買你買的, 退休要找一些穩健投資方法, 多留意財經, 睇通年報, 了解行業前景才投資.

載通國際控股 0062

見來我blog似乎想搵睡得著股票收下息, 我就選了一個這麼近, 那麼遠的現金牛公用股, 就是你一落街會見到一部部充滿英式紅色巴士, 係咪好近呢! 那麼遠是佢在香港巳經很多年, 我阿媽年代必然交通工具, 我小時候還有打票員, 又係咪好遠呢! 日日香港人番工必會交錢才能上班搵食, 仲唔係現金牛, 點解現在被忘記? 因為有地鈇關係, 地鈇準時又快又唔怕塞車, 所以入了冷宮, 你會問又介紹? 我最近一直監控佢, 因為我想入, 話說我現在年紀大, 每次出去總想起搭巴士, 因為唔想行落地鈇再行上來, 特別是我區一條很長的斜路再來一條樓梯才出路面, 我都會搭地鈇上班, 因為準時易掌握, 出事全港都知, 遲到有原有因, 特別是觀塘線, 一有信號故障呢, 不出3分鐘個月台爆到上番去地鈇站, 好番起碼10部車都入唔到車廂, 咁你應該留意地鈇? 隨著人口老化, 我地即將退下來, 我退了唔趕時間一定係巴士, 現在老人有2元優惠, 多了很多老人游巴士河, 再加上未來10年老化人口, 可能會多人選巴士? 最重要佢股價之前無起色係燃料費貴, 現在石油回落了, 石油回落持久性幾耐估唔到, 不過起碼未來10年佢未必輸俾地鈇, 地鈇現在開始老化, 維修費都好甘, 現在仲借錢填個爛工程, 以佢股價我覺得貴, 目前唔諗佢住, 相反巴士現價都唔算高, 買來補貼我老年交通費都不錯, 現息率有5厘多, 買佢唔使睡唔著, 再平再入下, 又係留俾下一代最佳禮物! 我曾經就在認識的朋友, 當中有90後, 一至有得揀會第一係巴士, 才令我有信心入, 花很多時間睇佢年報, 真係好多頁, 現在未消化, 市帳率係1.17倍, 市盈率13.40倍, 唔算平唔算貴!

互太紡織1382

網友提到互太紡織, 其實我買過這隻股, 幾時唔太記得, 我最有印象約10元左右, 當時我不是持有太長時間就放出, 應該唔係蝕價走, 當時佢係高息股, 所以我留意到佢, 今日我睇過佢最近年報, 互太在製衣是上游行業, 棉紗到布疋, 影響到佢盈利係原料價, 棉花! 據我所知棉花現在是低價, 另一樣是資本開支, 佢要不斷更新機器去迎合顧客, 佢手上都是知名大客, 我最鐘意馬莎買衫, 我次次正價買, 點解我會買, 佢適合上班服, 質料好, 唔會洗幾次就玩完, 印花款多, 另一個就係內衣品牌ck, 我用呢隻牌子好耐, 都是質料好, 再另一樣係人工, 國內人工係貴好多, 會令成本增加, 關稅應該唔輕, 還有匯價, 不過人仔貶值, 應該是有利, 負債比率健康, 選用核數師值得相信, 以佢上市以來息率都唔會坑股東, 又無又供又拆股票, 見佢盤數持股人幾傳統, 以現在股價, 市帳率是3倍多, 加上現時經濟環境似貴了些, 如果維持到息率都是不錯選擇, 市盈率達12倍, 我見去年係儲備取部份來應付息率, 所以懷疑是否維持到?

其實見網友講現在是捱價, 入股要講時機, 獨市港交所都會捱價, 更何況係寸步難行製衣業? 我就係捱唔住擠了出來!

衍生效應

最近升跌都是衍生效應, 牛熊證在成交佔比都很重, 真正像我買貨其實不多, 所有波動都是為衍生工具, 我家人說個市在跌, 問我還買貨, 我說個市點情況我只參考, 遇到自己睇緊嘅股啱價就入, 如果恆指市盈率係10倍樓下, 輸機會低好多, 唔代表一定對, 當隻股票變酸, 恆指什麼點數都唔關你事, 只係做斬的決定, 所以搵股好多野諗,我曾經有諗過設計一個問卷, 將睇中股票做數據, 填入問卷, 得分高咪等心儀價買, 要花很多時間去設計, 我要
退休先考慮, 平時做完野放工我要運動, 我都投資另一種財富是健康, 我很喜歡拉筋, 站樁同習太極拳, 這樣才有命同股票鬥長命!

今日掃貨

今日我掃貨, 我先入長和兩手, 我想收埋後日息, 除了息我個價90元樓下, 覺得幾抵, 由老師講話長和是未來10年值得持有忍到現在, 當時我覺得貴, 現在跌到91元, 佢之所以跌咁多好像同英國脫唔脫歐有關, 因為長和有英國投資, 脫唔脫未知數, 我個人覺得脫歐唔會囉, 所以我入貨, 另外我抄了兩轉永嘉, 佢個價好波動, 我係1.33入回, 6月中稍後除淨, 可能我之前做製衣, 情意結, 我兩次都賺到平均20% , 所以我清楚佢價格去向, 長期都睇好, 明天我會收到405股息, 我會再觀望下仲有什麼又平又靚股票, 今日收獲好滿意, 呢兩隻長渣短抄都得, 如果升20%我都會放出, 我是長,中同短投資, 短抄可是貼市唔悶, 會追下資料.....

論港交所

港交所係投資組合應該是成員, 原因是獨市生意, 唔會執笠, 資本成本不高, 一定有生意, 不過都有周期性, 差的時候可以好殘價, 所以我老師說係最差時候執平貨可以選港交所, 貴買都唔怕係唔抵, 所以呢個調整我都會溝貨, 本身有少少, 當儲貨!

我相信價值投資者現在除了等大減價, 仲要煩入咩貨, 我曾經試過入巴菲特所謂煙頭雪茄尾的股票, 發覺係好像好抵買, 但成交量好低, 因為唔起眼, 我就入了一隻35遠東發展, 見佢到過接近4元, 我係2.90入, 結果現在更低價, 因為佢有酒店業務, 所以就好沉, 息率都可以, 年底用股息入, 現在未收息, 過去都在6月公佈業績, 我覺得開始係佢收成期, 有無睇錯還望下個月, 歷史一定有息收, 所以唔擔心, 我一直用不同角度去了解股票, 發覺抵買唔一定賺, 要搵一個完美投資心法是一個很大學問呢!

又再量宽

今日竟然有一則說美國再量寬, 佢未有收縮資產負債表, 再放水又再水浸, 話未來10年都係超低息水平, 能說什麼?

今日我本來落永嘉的盤, 1.30 可惜入唔到, 唔緊要, 可能未來更平, 同時我都留意808泓富, 但我心目中價2.80, 老師話最近reits係抄上去, 唔好高追, 佢意思係入貨唔會長期持有收息, 果然今日大幅下跌, 同時持有都唔好賣出, 收息就收息! 

我估計恆指會再跌, 因為環球完全唔睇好, 個PE會看低一線, 我都會在心儀股票折讓先入, 心理上都舒服些, 維持長期低息, 手上高息股就不能賣, 還要加碼對抗通漲, 銀紙印幾多有幾多, 有資產股票就相當值錢.

長和都是我入貨名單中, 聽聞李超人病了, 保重!

集郵式投資

每次收到股息都等待下一次機會, 然後持有收息, 這種滾動式投資比較舒服, 風浪影響唔到你心情! 最近股神巴菲特提及到美國維持超低利率50年, 我一聽50年我都入土為安, 道指會10萬點, 唔好講50年咁耐, 講10年呢世界會更加亂, 打工不見天日,因為下流到地底, 中產不斷往下流, 上層可能更富有, 基層不斷上升, 仲點唔會天下大亂! 不敢想像, 似乎堅守現在投資方式, 預期來緊都會收息率高過去年, 第一友邦業績應該息率有增長, 另一隻405因為多了上海收租, 去年未反影係一次性收購支出, 同其下一個場裝修影響收入, 來緊應該會多過去年, 加上利用去年股息再入兩隻股票, 會增加股息收入, 有點像小時候集郵, 不斷儲不斷儲, 誰想過小時候的行為會應用到投資上!

調整中

果然魔咒靈驗, 連跌數天, 破二萬點機會高, 上次低至18000點, 趁低都是以這個做標準, 巳經準備資金, 目標是長和, 買入點低過90, 酒店信託基金候低位入, 希望低過2.50, 呢隻佔中我3元入, 短期放出賺了差價, 想不到現在更平, 因為本地旅游差, 可能未到最差時, 但又覺得係機會, 因為酒店質素不差, 總不會一直差下去, 在香港咁耐以來, 無聽到酒店出現大問題, 現九厘多非常吸引, 我肯定來緊無咁多息, 點都有7厘, 所以可以監察中, 另外沽了3322永嘉,今次是第二次賺差價, 候低再入貨, 我本身有收息, 有增長都有短抄, 短抄資金很少, 志在同市場接近.